Una storia vera d'altri tempi, condita da un po' di sano folklore dialettale:



"A quel tempo esisteva la befana fascista, che però no iera dada a tuti, ma solo ale famiglie bisognose, Un poco de magnar, un poco de vestir, qualche zogatolo e qualche dolzeto.

Mia mama fa domanda alla sezion dele Done Fasciste per gaver, almeno un paco, anche se la spera de più. De sta sezion fa parte una siora (che se ciamava Zoe) che abita nela nostra via; ela la sa che mia mama no paga afito, ma la sa anche in che condizioni che semo.
Cionostante, la dà parer contrario perché, la disi, chi no paga afito no gà dirito.
Mia mama ghe risponde che i fioi no magna muri, e no i va nudi. Gnente de far, la befana ne vien negada.

Mia mama iera un tipo impulsivo, che cò la se sentiva vitima de un'ingiustizia, no la podeva taser.
E via ela, la va de balin alla sezion del partito e la domanda de parlar col Federal.
I la fa acomodar, mia mama gnanche no la entra in uficio, la se ferma cola man sula porta e la ghe disi in muso a 'sto sorpreso Federal:
- Se mi no go dirito gnanche a un paco dela Befana, la sà cossa che ghe digo? Andè a remengo voi, l'Italia e Mussolini!

Dopo de che la se gira senza spetar risposta, la sbati la porta, e la ciapa la via de casa.
- Cossa go fato?! - per la strada la se insultava da sola - cossa sucedi 'desso!

Ben, xe sucesso che a casa xe rivai no tre pachi dela Befana Fascista, ma sei, acompagnai da un biglieto del Federal in persona:

" Il suo coraggio a denunciare il sopruso merita un premio"
seguido da l'imancabile Vincere e Vinceremo!"